Mirko Yelichich: \"Yosh futbolchilar yanada ko‘proq ishlashlari kerak\"
Proliganing 6-turidan o‘rin olgan "Lokomotiv" - "Olympic" (2:0) uchrashuvidan keyin “Olympic” ustozi Mirko Yelichich matbuot anjumanida ishtirok etdi.
"O‘yin yaxshi o‘tdi. Raqib ko‘proq bosim qildi, to‘p nazorati ham ular tomonida bo‘ldi. Bizga tajriba yetishmadi", - deb gap boshladi Yelichich.
- Ikkinchi o‘tkazilgan golda darvozabon xato qildi. Uchrashuv davomida u yaxshi o‘ynagandi, bu xatoga nima sabab bo‘ldi deb o‘ylaysiz?
- To‘g‘risi, o‘sha golni ko‘rmadim, zaxiradan futbolchi tushirishga tayyorlanayotgandim. U yosh posbon, tajriba kam, konsentratsiya yetishmadi. Eng yaxshi darvozabonlar ham xato tufayli gol o‘tkazishadi. Futbolda ko‘p narsani millisoniyalar hal qiladi. Millisoniyaga konsentratsiyani yo‘qotsang xato qilasan va gol o‘tkazib yuborasan.
- 6 ta tur ortda qoldi, "Olympic" siz kutgan futbolni namoyish etyaptimi?
- Yigitlar o‘z vazifalarini bilib olishgan. Albatta yoshlar bilan ishlashda vaqt kerak. 4 oy kam muddat. Yosh futbolchilar yanada ko‘proq ishlashlari kerak.
