«Милан» истеъфога чиқарилган Аллегри ва раҳбарларга 20 миллион евродан ортиқ товон пули тўлайди
«Милан» клуби жамоанинг собиқ бош мураббийи Массимилиано Аллегри, шунингдек, собиқ бош директор Жоржо Фурлани ва спорт директори Игли Тарега жами 20 миллион евродан ортиқ товон пули тўлайди. Бу ҳақда La Gazzetta dello Sport нашри хабар бермоқда.
Фурлани 2028 йилгача мўлжалланган шартномасига кўра, бонусларни ҳисобга олган ҳолда қарийб 10 миллион евро ишлаб топиши керак эди. Шартномаси 2027 йилгача етиб бориши кўзда тутилган Аллегри 9 миллион евро, Таре эса тахминан 3 миллион евро олиши белгиланган эди.
Қайд этилишича, ушбу суммалар ҳали якуний эмас ва клуб ишдан бўшатилган мутахассислар билан музокаралар ўтказиш орқали бу харажатларни камайтиришга эришиши мумкин.
Эслатиб ўтамиз, аввалроқ «Милан» клуби келгуси мавсум учун Чемпионлар лигаси йўлланмасидан қуруқ қолгани сабабли Массимилиано Аллегри, спорт ва бош директорларини истеъфога чиқарганини эълон қилган эди.
Италия чемпионатининг 38 та учрашувидан сўнг «Милан» 70 очко жамғарган ҳолда турнир жадвалида бешинчи ўринни эгаллади.
