Металлург ПФК ҳалол ўйин тарафдори
ЎФА махсус инспекцияси ва ЎзПФЛ вакиллари ҳамда "Металлург" профессионал футбол клуби мураббий, футболчи ва ходимлари иштирокида учрашув бўлиб ўтди.
Учрашув мобайнида келишилган ўйинларга қарши курашишда футбол жамоатчилиги биргаликда ҳаракат қилиши жуда муҳим эканлиги, ҳалол футбол орқали ўсишга эришиш мумкинлиги таъкидланди. Бу каби ишларга жалб қилинган футболчи ва мураббийларни жиддий жазо кутгани тилга олинди.
Учрашув давомида "Металлург" клуби вакиллари жамоанинг ҳар бир аъзоси ҳалол ўйин тарафдори эканлиги, қайта ташкил этилган клуб ўз олдига энг юқори мақсадларни қўйгани ва бу йўлда катта кўламдаги ишлар амалга оширилаётгани таъкидлаб ўтишди. Бекобод клуби бу йўналишда ҳам профессионал иш олиб боришни ният қилган. Шу мақсадда жамоа аъзолари ва ходимлари иштирокида мазкур масалалар муҳокама қилиб чиқилган. Клуб ҳар қандай кўринишда қонун бузилиши, уни четлаб ўтишга бўлган ҳаракатларга қарши эканлиги, пора бериш, нақд пул айланмасига, умуман исталган кўринишдаги коррупцион вазиятларга кескин қарши эканлигига урғу бериб ўтилган.
Эслатиб ўтамиз, бир неча кун аввал Хитойнинг "Синхуа" нашри келишилган ўйинлар можароси сабабли қатор клублар жазоланганини маълум қилганди. Жумладан, "Шанхай Шенхуа" клубидан 10 очко олиб ташлангани ҳақида хабар берганди.
Кузда эса Қозоғистон футболида келишилган ўйинлар, шунингдек, футболчи ва мураббийларнинг букмекерлар фаолиятига жалб этилиши ҳолатлари аниқланганди.
