Месси — ЖЧ-2026нинг энг яхши футболчиси деб топилди
The Athletic нашри Жахон чемпионати-2026да ҳозирча энг яхши ўйин кўрсатаётган футболчилар рейтинги эълон қилди.
Нуфузли нашр талқинига кўра, рўйхатнинг биринчи поғонасидан Аргентина терма жамоаси сардори Лионель Месси жой олди. 39 ёшли футболчи мундиал давомида ажойиб спорт формасини намоён этмоқда. Месси турнирдаги барча ўйинларда гол уришга муваффақ бўлди ва ҳозирга қадар 7 та гол билан мусобақанинг энг яхши тўпурарлари қаторидан бормоқда.
Рейтингнинг иккинчи поғонасидан Франция терма жамоаси етакчиси Килиан Мбаппе жой олди. Кучли учликни эса яна бир франциялик футболчи — Майкл Олисе якунлаб берди. Бу эса Франция терма жамоасининг турнирдаги индивидуал жиҳатдан энг кучли футболчиларга эга эканини кўрсатмоқда.
Шунингдек, кучли ўнталикдан Харри Кейн, Ашраф Ҳакими, Винисиус Жуниор, Эрлинг Холанд, Усмон Дембеле, Исмоил Сайбари ва Бруно Гимараеш ҳам жой олди.
Эътиборлиси, Англия ярим ҳимоячиси Жуд Беллингем рейтингда 15-ўринда қайд этилган бўлса, Испания терма жамоасининг ёш юлдузи Ламин Ямал 16-ўринни эгаллади. Кабо-Верде терма жамоаси дарвозабони Возинья эса 49-ўриндан жой олди.
The Athletic тузган ушбу рейтинг футболчиларнинг ЖЧ-2026даги умумий таъсири, ўйин сифати, жамоасига қўшган ҳиссаси ва индивидуал кўрсаткичлари асосида шакллантирилган.
Мессининг бу ёшда ҳам мундиалнинг энг яхши футболчиси сифатида эътироф этилиши мухлислар орасида катта муҳокамаларга сабаб бўлмоқда.
