Месси яширинча «Барселона» стадионига борди
Аргентина терма жамоаси ва “Интер Майами” клуби юлдузи Лионель Месси собиқ жамоаси «Барселона»нинг янгиланган аренасида бўлди.
Клубнинг афсонаси “Камп Ноу” стадионидан тунда, бўш трибуналар олдида олинган бир қатор суратларни эълон қилди.
Қайд этилишича, сафар журналистлар ва мухлислардан сир тутилган.
“Кеча бутун вужудим билан соғинган жойимга қайтдим. Мен ниҳоятда бахтиёр бўлган жой, йигитлар сиз мени дунёдаги энг бахтли одам деб ҳис қилишга мажбур қилган жой. Умид қиламанки, бир кун келиб қайтаман ва нафақат футболчи сифатида ўзим билан хайрлашиш учун...», деб ёзди футболчи ижтимоий тармоқдаги саҳифасида.
Эслатиб ўтамиз, Месси 2003-2021 йилларда каталонияликлар шарафини ҳимоя қилган ва клубнинг тирик афсонасига айланган. У 10 марта Испания чемпионлигини, 4 марта Чемпионлар Лигасидаги ғолибликни қўлга киритган.
