Месси яна “Барселона” либосида майдонга тушиши мумкин — лекин атиги 45 дақиқага
Лионель Месси яна “Барселона” либосида майдонга тушиши мумкин. Каталония клуби аргентиналик футболчи шарафига “Камп Ноу”да махсус хайрлашув учрашуви ташкил этишни режалаштирмоқда. Режага кўра, “Барселона” Жоан Гампер кубогида “Интер Майами” билан учрашади ва Месси баҳснинг бир бўлимини собиқ жамоаси сафида ўтказиши мумкин. Бу ҳақда El Nacional хабар бермоқда.
Манбага кўра, учрашув 2028 йилда ташкил этилиши режалаштирилган, бироқ “Камп Ноу”даги реконструкция ишлари эртароқ якунланса, тадбир 2027 йилдаёқ ўтказилиши мумкин. Месси биринчи 45 дақиқани “Барселона”, иккинчи бўлимни эса “Интер Майами” сафида ўтказиши кўзда тутилган.
“Интер Майами” ҳаммуаллифи Дэвид Бекхэм ҳам клубнинг ушбу учрашувда иштирок этишига розилик билдиргани айтилмоқда. Аввалроқ “Барселона” президенти Жоан Лапорта клуб Месси учун реконструкция ишлари якунланган “Камп Ноу”да, қарийб 105 минг мухлис қаршисида муносиб хайрлашув маросими ўтказишни истayotganини маълум қилган эди.
Маълумот учун, Месси 2003–2021 йиллар давомида “Барселона” тизимида фаолият олиб борди. У асосий жамоа сафида 778 та учрашувда 672 та гол уриб, клуб билан 35 та соврин қўлга киритган. Аргентиналик футболчи “Барселона” тарихида ҳам ўйинлар, ҳам голлар сони бўйича рекордчи ҳисобланади.
