Месси ва Роналду илк бор бир жамоада ўйнаши мумкин
Лионель Месси ва Криштиану Роналду илк бор бир жамоада майдонга тушиши мумкин. ESPN Argentina маълумотига кўра, Карлос Тевес декабрь ойида Буэнос-Айресдаги “La Bombonera” стадионида хайрлашув учрашувини ўтказишни режалаштирмоқда.
Манбага кўра, учрашув 19 декабрь куни ўтказилиши кутилмоқда. Тевес фаолияти давомида бирга ўйнаган қарийб 60 нафар футболчини таклиф қилмоқчи. Меҳмонлар орасида Месси ва Роналду билан бир қаторда Уэйн Руни, Андреа Пирло ва бошқа машҳур футболчилар ҳам бўлиши мумкин.
Тевес Аргентина терма жамоасида Месси билан, “Манчестер Юнайтед” сафида эса Роналду билан бирга тўп сурган. Шу сабаб икки юлдузнинг бир жамоада майдонга тушиши эҳтимоли футбол мухлисларида катта қизиқиш уйғотмоқда. Ҳозирча Месси ва Роналдунинг иштироки расман тасдиқланмаган.
Маълумот учун, 42 ёшли Карлос Тевес профессионал футболчилик фаолиятини 2022 йил июнь ойида якунлаган. TyC Sports хабарига кўра, “Бока Хуниорс” президенти Хуан Роман Рикелме хайрлашув учрашувини “La Bombonera”да ўтказишга розилик берган, аниқ сана эса ҳали расман эълон қилинмаган.
