Месси терма жамоада дебют қилганига 21 йил тўлди
Месси терма жамоада дебют қилганига 21 йил тўлди. У 47 сониядан сўнг четлатилган эди.
Бундан роппа-роса 21 йил олдин, 2005 йилнинг 17 август куни Лионель Месси Аргентина асосий терма жамоаси сафида илк бор майдонга тушган эди.
Катталар терма жамоасидаги дебютидан бор-йўғи бир ой олдин Месси Нидерландида ўтказилган U-20 жаҳон чемпионатида ғолиб чиққан жамоанинг асосий қаҳрамонларидан бирига айланганди. Ўшанда Лео олти гол урган — бу турнирдаги энг яхши кўрсаткич эди, шу жумладан, Нигерияга қарши финалда иккита гол киритган. У бирданига иккита шахсий соврин — «Олтин бутса» ва «Олтин тўп»ни қўлга киритган.
2005 йилнинг август ойида Месси, худди 1977 йилда Диего Марадона бўлгани каби, Венгрияга қарши ўртоқлик ўйини учун терма жамоага илк бор чақирув олди. 63-дақиқада росариолик 18 ёшли йигитча Лисандро Лопесни алмаштирди.
Мессининг «альбиселесте» либосидаги биринчи ўйини тез якунланди. Майдонга тушганидан бор-йўғи 47 сония ўтиб Лионель тўпни қабул қилиб олди ва уни футболкасидан тортиб тўхтатиб қолишга уринган Вилмош Ваншакдан қочиб кетмоқчи бўлди. Аргентиналик бунга жавобан қўлини силкитиб юборди ва рақибига тирсаги билан тегиб кетди.
Ҳакам тезда Мессига тўғридан-тўғри қизил карточка кўрсатди. Ваншак 2022 йилда ўша вазиятни шундай эсга олган эди:
«Биз Аргентина терма жамоаси жуда кучли эканлигини билардик, аммо айниқса мана шу футболчини кўришни хоҳлардик, чунки ўша пайтдаёқ ҳамма уни катта юлдуз бўлади деб гапирарди. Балки унинг фаолиятига айнан мен ибтидо ясаганман!»
У йигитча ҳақиқатан ҳам катта юлдузга айланди.
