Месси иштирокидаги тадбир ташкилотчиси Ҳиндистонда ҳибсга олинди
Ғарбий Бенгалия губернатори Ананда Бозе Калкутта шаҳридаги «Солт-Лейк» стадионида Аргентина миллий жамоаси ҳужумчиси ва сардори Лионель Месси иштирокида ўтказилган тадбир билан боғлиқ можарога муносабат билдирди. Унинг сўзларига кўра, мазкур тадбир ташкилотчиси мухлислар стадионда тартибсизликлар уюштиргач, ҳибсга олинган. Шунингдек, Бозе ҳозирда ушбу ҳолат юзасидан расмий тергов ишлари олиб борилаётганини маълум қилди. Бу ҳақда ANI ахборот агентлиги хабар бермоқда.
Бундан ташқари, Ғарбий Бенгалия бош вазири Мамата Банерҷи Лионель Месси ва норозилик билдирган мухлислардан узр сўради.
«Бугун «Солт-Лейк» стадионида гувоҳ бўлган нотўғри бошқарув мени чуқур ташвишга солди ва ҳайратга солди. Мен стадионга минглаб спорт ишқибозлари ва мухлислар билан бирга, севимли футболчиси Лионель Мессини ҳеч бўлмаганда бир лаҳзага бўлса ҳам кўриш учун йиғилган тадбирга бораётган эдим.
Ушбу нохуш ҳолат учун Лионель Мессидан, шунингдек, барча спорт мухлислари ва унинг ишқибозларидан чин дилдан узр сўрайман», — деб ёзди Банерҷи X ижтимоий тармоғидаги саҳифасида.
Аввалроқ хабар қилинганидек, мухлислар тадбирга чипта учун пул тўлаганига қарамай, Мессини тўлиқ кўра олмаганидан сўнг норозилик билдириб, вандализм ҳаракатларига қўл урган. Аргентиналик юлдуз футболчи майдонни тезда тарк этгани бунга сабаб бўлган.
