Месси эри вафот этган журналистга ёрдам таклиф қилгани маълум бўлди
Аргентиналик журналист Вероника Брунати Лионель Месси билан боғлиқ таъсирли воқеани ёдга олди. У Аргентина терма жамоасидаги фаолиятини якунлаган футболчига бағишланган мақоласида 2014-йилда турмуш ўртоғи вафот этганидан сўнг Месси унга ва фарзандларига ёрдам беришга тайёр бўлганини маълум қилди.
Брунатининг эри, журналист Хорхе “Эль Топо” Лопес 2014-йилда йўл-транспорт ҳодисасида ҳалок бўлган. У кетаётган таксига полиция таъқибидан қочаётган жиноятчилар автомобили келиб урилган. Оғир йўқотишдан кейин Месси Брунатини “Барселона”нинг Жоан Гампер базасига таклиф қилган.
Журналистнинг сўзларига кўра, Месси унинг фарзандлари — Агус ва Лусиянинг исмларини эслаб қолган ва оилага қандай ёрдам бера олишини сўраган. Брунати эса болалари Мессини кўрганида хурсанд бўлишини айтган. Футболчи эса бундан ташқари бошқа ёрдам кўрсатишга ҳам тайёрлигини билдирган.
Маълумот учун, Брунати узоқ йиллар давомида Аргентина терма жамоаси ва Лионель Мессининг фаолиятини ёритиб келган. У ўз мақоласида Месси нафақат футболчи сифатида, балки оғир даврда унинг оиласига далда берган инсон сифатида ҳам ҳаётида алоҳида ўрин тутишини таъкидлаган.
