Месси бошчилигидаги “Интер Майами” чемпионликни ҳимоя қилиш имкониятини қўлга киритди
АҚШнинг “Интер Майами” клуби MLS чемпионатининг плей-офф босқичига чиқишни муддатидан аввал таъминлади. Лионель Месси етакчилигидаги жамоа мунтазам мавсум якунига бешта тур қолганида ҳал қилувчи босқичда иштирок этиш ҳуқуқини қўлга киритди. Бу ҳақда MLS расмий сайти хабар бермоқда.
Манбага кўра, “Интер Майами” “Нью-Йорк Сити” устидан қозонилган ғалабадан сўнг Шарқий конференцияда иккинчи ўринга кўтарилган. Жамоа 29 та учрашувда 52 очко жамғарган ва плей-офф йўлланмасини расман кафолатлаган.
Майамиликлар жорий мавсумда ҳам чемпионлик учун курашни давом эттиришни мақсад қилган. Клуб 2025 йилги муваффақиятини такрорлаб, кетма-кет иккинчи марта MLS кубогини қўлга киритишга интилмоқда.
Маълумот учун, Лионель Месси жорий мавсумда 23 та гол ва 14 та голли узатма билан чемпионатнинг энг самарали футболчиларидан бири бўлиб турибди. “Интер Майами” 2025 йилда MLS чемпионига айланган. Жамоа бу йил сентябр ойида Campeones Cup совринини ҳам қўлга киритган.
