Messi boshchiligidagi “Inter Mayami” chempionlikni himoya qilish imkoniyatini qo‘lga kiritdi
AQSHning “Inter Mayami” klubi MLS chempionatining pley-off bosqichiga chiqishni muddatidan avval ta’minladi. Lionel Messi yetakchiligidagi jamoa muntazam mavsum yakuniga beshta tur qolganida hal qiluvchi bosqichda ishtirok etish huquqini qo‘lga kiritdi. Bu haqda MLS rasmiy sayti xabar bermoqda.
Manbaga ko‘ra, “Inter Mayami” “Nyu-York Siti” ustidan qozonilgan g‘alabadan so‘ng Sharqiy konferensiyada ikkinchi o‘ringa ko‘tarilgan. Jamoa 29 ta uchrashuvda 52 ochko jamg‘argan va pley-off yo‘llanmasini rasman kafolatlagan.
Mayamiliklar joriy mavsumda ham chempionlik uchun kurashni davom ettirishni maqsad qilgan. Klub 2025-yilgi muvaffaqiyatini takrorlab, ketma-ket ikkinchi marta MLS kubogini qo‘lga kiritishga intilmoqda.
Ma’lumot uchun, Lionel Messi joriy mavsumda 23 ta gol va 14 ta golli uzatma bilan chempionatning eng samarali futbolchilaridan biri bo‘lib turibdi. “Inter Mayami” 2025-yilda MLS chempioniga aylangan. Jamoa bu yil sentabr oyida Campeones Cup sovrinini ham qo‘lga kiritgan.
