Месси биринчи, Сон иккинчи — МЛСда энг кўп маош олувчи футболчилар рейтинги эълон қилинди
МЛС футболчилар ассотсиацияси 2025 йилнинг 1 октябр ҳолатига кўра лигадаги футболчиларнинг маошлар рейтинги эълон қилди. Энг юқори маош олувчи сифатида ҳанузгача «Интер Майами» ҳужумчиси Лионел Месси етакчилик қилмоқда — у йилига 20,4 миллион доллар ишлаб топади.
Иккинчи ўринда ёзда «Лос-Анжелес» клубига ўтган Сон Хён Мин жойлашган. Унинг йиллик маоши 11,2 миллион долларни ташкил қилади. Учинчи поғонадан эса Мессининг жамоадоши, яримҳимоячи Серхио Бускетс жой олган — 8,8 миллион доллар.
Кучли бешликни Мигел Алмирон («Атланта Юнайтед», 6,1 млн доллар) ва Ирвинг Лосано («Сан-Диего», 6 млн доллар) якунлаб берган.
МЛС жамоалари орасида энг катта маош бюджетига эга жамоа бу — «Интер Майами» ҳисобланади. Клубнинг умумий иш ҳақи фонди 48,97 миллион долларни ташкил этади. Энг кам харажат қилувчи жамоа — «Монреал Импакт», у футболчилар маошига атиги 12,92 миллион доллар сарфлайди.
