Мерино жарохати сабаб узоқ муддатга сафдан чиқди
«Арсенал» клуби расмий сайти жамоа яримҳимоячиси ва Испания терма жамоаси аъзоси Микел Мерино жиддий жароҳат олганини тасдиқлади. 29 ёшли футболчи Англия Премьер-лигасининг 23-туридан ўрин олган «Манчестер Юнайтед»га (2:3) қарши баҳсда оёғидан жароҳат олган эди.
«Тиббий текширувлар натижасида Мерининг ўнг оёқ панжа суяги шикастлангани маълум бўлди. Яқин кунларда футболчи операция қилинади, шундан сўнг тикланиш ва реабилитация жараёнини бошлайди. Афсуски, футболчининг узоқ муддат майдонга туша олмаслиги кутилмоқда», — дейилади Лондон клуби баёнотида.
Маълумотларга кўра, «канонирлар» Мерининг мавсум якунига қадар умумий машғулотларга қайтишига умид қилишмоқда, бироқ унинг жорий мавсумда бошқа майдонга тушмаслик эҳтимоли ҳам йўқ эмас.
Микел Мерино жорий мавсумда «Арсенал»нинг муҳим фигураларидан бирига айланган эди. У барча турнирларда 33 та учрашувда майдонга тушиб, 6 та гол урди ва 3 та голли узатмани амалга оширди.
Эслатиб ўтамиз, Мерино 2024 йилда Испания терма жамоаси билан Европа чемпионлигини қўлга киритган эди.
