Менни Пакьяонинг ўғли профессионал боксдаги илк ғалабасини қўлга киритди
Бундан аввалги жанги дуранг билан якунланганди.
ФОТО: Getty Images
4 апрелга ўтар кечаси АҚШнинг Калифорния штати, Темекюла шаҳрида профессионал бокс кечаси бўлиб ўтди. Мазкур тадбир доирасида саккиз вазн тоифасида собиқ жаҳон чемпиони, 47 ёшли афсонавий филиппинлик боксчи Менни Пакьяонинг ўғли — Жимюэл Пакьяо ўзининг навбатдаги жангини ўтказди.
25 ёшли Жимюэлга ушбу баҳсда америкалик спортчи Деррик Гейтс рақиблик қилди. Жанг муддатидан аввал якунланди: Пакьяонинг ўғли рақибини икки бор нокдаун ҳолатига туширганидан сўнг, учрашув техник нокаут билан тўхтатилди.
Бу Жимюэл учун профессионал боксдаги иккинчи жанг бўлди. Эслатиб ўтамиз, у 2025 йилнинг кузида ўтказилган дебют жангида бошқа бир дебютант — Брендон Лаллига қарши тўрт раундлик баҳсда дуранг қайд этган эди.
Насрулло Каримов
Журналист