Menni Pakyaoning o‘g‘li professional boksdagi ilk g‘alabasini qo‘lga kiritdi

4 aprelga o‘tar kechasi AQSHning Kaliforniya shtati, Temekyula shahrida professional boks kechasi bo‘lib o‘tdi. Mazkur tadbir doirasida sakkiz vazn toifasida sobiq jahon chempioni, 47 yoshli afsonaviy filippinlik bokschi Menni Pakyaoning o‘g‘li — Jimuel Pakyao o‘zining navbatdagi jangini o‘tkazdi.

25 yoshli Jimuelga ushbu bahsda amerikalik sportchi Derrik Geyts raqiblik qildi. Jang muddatidan avval yakunlandi: Pakyaoning o‘g‘li raqibini ikki bor nokdaun holatiga tushirganidan so‘ng, uchrashuv texnik nokaut bilan to‘xtatildi.

Bu Jimuel uchun professional boksdagi ikkinchi jang bo‘ldi. Eslatib o‘tamiz, u 2025 yilning kuzida o‘tkazilgan debyut jangida boshqa bir debyutant — Brendon Lalliga qarshi to‘rt raundlik bahsda durang qayd etgan edi.

Nasrullo Karimov

Jurnalist