Мбаппе ва Винисиус дўст эмас
Мадриднинг “Реал” клуби ҳужумчилари Килиан Мбаппе ва Винисиус Жуниор ўртасидаги муносабатлар кутилганидек яқин эмаслиги маълум қилинди. Франциялик футболчининг жамоадошларининг аксарияти билан алоқалари фақат профессионал даражада экани айтилмоқда. Бу ҳақда OK Diario нашрига таяниб, The Touchline хабар бермоқда.
Манбага кўра, Мбаппе ва Винисиус майдон ҳамда омма олдида ўзаро яқин муносабатда кўринса-да, аслида улар дўст эмас. Футболчилар ўртасидаги алоқалар асосан иш юзасидан бўлиб, уларнинг ҳеч бири муносабатларни янада яқинлаштиришга алоҳида интилмаяпти.
Шунингдек, жамоанинг яна бир юлдузи Жуд Беллингем билан ҳам айрим келишмовчиликлар мавжудлиги таъкидланган. Англиялик ярим ҳимоячи аввалроқ Мбаппе ва Винисиуснинг айрим хатти-ҳаракатларидан норози бўлган. “Реал” раҳбарияти эса ундан вазиятга сабр билан ёндашишни сўраган. Клуб жамоадаги тарангликни камайтириш ва етакчи футболчилар ўртасидаги ҳамжиҳатликни мустаҳкамлашга ҳаракат қилмоқда.
Маълумот учун, Килиан Мбаппе 2024 йилда ПСЖдан “Реал”га келиб қўшилган. Винисиус Жуниор 2018 йилдан, Жуд Беллингем эса 2023 йилдан буён Мадрид клуби шарафини ҳимоя қилмоқда. Ҳозирча футболчилар ўртасидаги муносабатларга оид хабарлар расман тасдиқланмаган.
