Мбаппе узоқ масофадан урилган голлар сони бўйича шахсий рекордини янгилади
Мадриднинг «Реал» клуби ҳужумчиси Килиан Мбаппе Испания чемпионатининг 33-туридан ўрин олган «Алавес»га қарши баҳсда (2:1) гол уриб, ўзининг янги шахсий кўрсаткичини қайд этди.
Франциялик форвард учрашувнинг 30-дақиқасида жарима майдончаси ташқарисидан зарба йўллаб, ҳисобни очди — тўп рикошет ёрдамида дарвоза тўридан жой олди. Бу гол Мбаппе учун 2025/2026 йилги мавсумда барча турнирлар доирасида узоқ масофадан йўлланган саккизинчи гол бўлди.
Шу тариқа, у нафақат ўзининг шахсий рекордини янгилади, балки ушбу кўрсаткич бўйича Европанинг топ-5 лигалари футболчилари орасида етакчига айланди. Бу ҳақда Opta Sport хабар бермоқда.
Жорий мавсумда Мбаппе Мадрид клуби сафида барча мусобақаларда 40 та ўйин ўтказиб, ўз ҳисобига 41 та гол ва 6 та голли узатмани ёздириб қўйди.
