Mbappe uzoq masofadan urilgan gollar soni boʻyicha shaxsiy rekordini yangiladi
Madridning «Real» klubi hujumchisi Kilian Mbappe Ispaniya chempionatining 33-turidan o‘rin olgan «Alaves»ga qarshi bahsda (2:1) gol urib, o‘zining yangi shaxsiy ko‘rsatkichini qayd etdi.
Fransiyalik forvard uchrashuvning 30-daqiqasida jarima maydonchasi tashqarisidan zarba yo‘llab, hisobni ochdi — to‘p rikoshet yordamida darvoza to‘ridan joy oldi. Bu gol Mbappe uchun 2025/2026 yilgi mavsumda barcha turnirlar doirasida uzoq masofadan yo‘llangan sakkizinchi gol bo‘ldi.
Shu tariqa, u nafaqat o‘zining shaxsiy rekordini yangiladi, balki ushbu ko‘rsatkich bo‘yicha Yevropaning top-5 ligalari futbolchilari orasida yetakchiga aylandi. Bu haqda Opta Sport xabar bermoqda.
Joriy mavsumda Mbappe Madrid klubi safida barcha musobaqalarda 40 ta o‘yin o‘tkazib, o‘z hisobiga 41 ta gol va 6 ta golli uzatmani yozdirib qo‘ydi.
