Мбаппе учун мавсум тугади – манба
Мадриднинг “Реал” клуби ҳужумчиси Килиан Мбаппе жароҳати сабабли 2025/2026 йилги мавсум охиригача бўлган қолган ўйинларда иштирок этмайди. Бу ҳақда “El Chiringuito” хабар берди.
Манбага кўра, Мбаппенинг жароҳати дастлаб кўринганига нисбатан анча жиддийроқ бўлиб чиққан. Бироқ якуний ташхис қўйилганича йўқ.
Аввалроқ Мбаппенинг чап оёғи тизза ости пайларида зўриқиш борлиги маълум бўлган. Француз футболчиси Испания чемпионатининг 32-тури доирасидаги “Бетис”га қарши ўйиннинг (1:1) 81-дақиқасида захирага олинган.
Маълумот учун, Ла Лиганинг жорий мавсумида Мбаппе 28 та учрашувда майдонга тушиб, 24 та гол ва тўртта голли узатмага муаллифлик қилди. Transfermarkt портали маълумотларига кўра, футболчининг тахминий бозор қиймати 200 миллион еврони ташкил этади.
