Мбаппе тиззасидаги жароҳат билан жами 270 дақиқа ўйнади
Мадриднинг «Реал» клуби ҳужумчиси Килиан Мбаппе жамоанинг сўнгги учрашувларида оғриқлар билан майдонга тушгани маълум бўлди. AS нашрининг хабар беришича, франциялик футболчи жароҳатланган бўғим билан жами 270 дақиқа ўйин ўтказган.
Мбаппе Ла Лига доирасида «Алавес»га қарши (2:1) ва «Севилья» билан бўлган (2:0) учрашувларда, шунингдек Испания Кубогида «Талавера-де-ла-Рейна»га қарши баҳсда (3:2) тўлиқ 90 дақиқадан ҳаракат қилган. Ўтказилган тиббий кўрикдан сўнг футболчининг Испания Суперкубоги ўйинларидаги иштироки савол остида қолмоқда.
Суперкубок ярим финал учрашувлари 7 ва 8 январь кунларига белгиланган. Унда «Барселона» — «Атлетик» (Бильбао) ҳамда Мадриднинг «Реал» ва «Атлетико» жамоалари ўзаро тўқнаш келади. Турнир финали 11 январь куни бўлиб ўтади. Мусобақа Жидда (Саудия Арабистони) шаҳрида ташкил этилади.
Килиан Мбаппе «Қироллик клуби» сафида 2024 йил ёзидан буён тўп суриб келмоқда. Шу вақтга қадар у Мадрид жамоаси таркибида 83 та учрашувда 73 та гол ва 10 та голли узатма муаллифи бўлган. Футболчининг клуб билан тузилган шартномаси 2029 йил июнига қадар амал қилади.
