Мбаппе \"Реал Мадрид\"дан кетишга қарор қилди
Мадриднинг “Реал” клуби ҳужумчиси Килиан Мбаппе 2027-йил ёзида жамоани тарк этиб, фаолиятини Англия Премьер-лигасида давом эттириши мумкин. Франциялик футболчи “Ливерпуль”ни ўзининг асосий вариантларидан бири сифатида кўрмоқда. Бу ҳақда испаниялик журналист Франсуа Гальярдо хабар бермоқда.
Манбага кўра, 27 ёшли ҳужумчи “Реал Мадрид”даги айрим вазиятлардан норози ва клубни тарк этиш ҳақида ўйламоқда. “Ливерпуль” эса футболчининг онаси ва вакили Файза Ламари билан дастлабки алоқаларни ўрнатган. Инглиз клуби Мбаппе трансфери учун 200–250 миллион евро сарфлашга тайёр бўлиши мумкин.
Франциялик юлдузнинг норозилигига кийиниш хонасидаги муҳит ва жамоадошлари билан муносабатлари сабаб бўлаётгани таъкидланмоқда. Шунингдек, футболчининг жароҳатдан тикланиш жараёни билан боғлиқ айрим масалаларда ҳам келишмовчиликлар мавжуд. Бироқ Мбаппенинг кетиши ёки “Ливерпуль” билан музокаралар олиб бораётгани ҳозирча расман тасдиқланмаган.
Маълумот учун, Килиан Мбаппе 2024-йил ёзида ПСЖдан “Реал Мадрид”га эркин агент сифатида келиб қўшилган. Унинг амалдаги шартномаси 2029-йилгача мўлжалланган. Франциялик ҳужумчи 2025/26-йилги мавсумда барча мусобақаларда 44 та учрашувда 42 та гол урган. Шунингдек, 15 та гол билан УЕФА Чемпионлар лигасининг энг яхши тўпурари бўлган.
