Мбаппе фаолиятини «Фенербахче»да давом эттириши мумкин
«Лилль» ярим ҳимоячиси Этан Мбаппе фаолиятини Туркияда давом эттириши мумкин. Килиан Мбаппенинг 19 ёшли укаси воситачилар томонидан «Фенербахче»га таклиф қилинган. Истанбул клуби ёш футболчи номзодини кўриб чиқмоқда. Бу ҳақда инсайдер Экрем Конур хабар бермоқда.
Манбага кўра, «Фенербахче» қишки трансфер ойнаси олдидан 23 ёшгача бўлган футболчиларни кузатмоқда. Этан Мбаппе ҳам клубнинг эҳтимолий трансферлар рўйхатига киритилган, бироқ ҳозирча томонлар ўртасида расмий музокаралар ёки келишув мавжуд эмас.
Этаннинг «Лилль» билан амалдаги шартномаси мавсум якунида тугайди. Франция клуби футболчини ўз сафида сақлаб қолиш ва у билан янги келишув имзолаш имкониятини ҳам кўриб чиқмоқда. «Фенербахче» эса футболчи бўйича якуний қарорни унинг ўйинларини кузатиб, спорт бўлими хулосасидан сўнг қабул қилиши кутилмоқда.
Маълумот учун, 19 ёшли Этан Мбаппе жорий мавсум Франция чемпионатида «Лилль» сафида 5 та учрашувда майдонга тушиб, 1 та гол урган. Унинг трансфер қиймати 12 миллион евро атрофида баҳоланмоқда.
