Мбаппе қарзни ундириш учун «ПСЖ» офисига суд ижрочиларини юбoрди
7 феврал, жума куни, суд ижрочилари «Реал Мадрид» ҳужумчиси Килиан Мбаппенинг талаби билан «ПСЖ» офисига ташриф буюришди. Бунинг сабаби Париж клуби футболчига тўланиши керак бўлган таътил пулларини ҳалигача ўтказиб бермаганидир. Бу ҳақда L’Équipe нашри хабар бермоқда.
Маълум қилинишича, футболчига тегишли бўлган жами 60,9 миллион еврoнинг 5,9 миллион евроси ҳалигача тўланмаган. Ушбу маблағ Мбаппенинг йиғилиб қолган таътил пуллари ҳисобланади. Суд ижрочиларининг ташрифидан мақсад — парижликларга қарздорликни зудлик билан қоплаш ҳақидаги тўлов билдиришномасини топшириш бўлган.
Агар «ПСЖ» Мбаппе билан ҳисоб-китобни амалга оширмаса, суд саккиз кун ичида клуб мулкини хатловга олиши мумкин.
Шунингдек, Франция терма жамоаси сардорининг адвокатлари қарзни жамоа ҳисоб рақамларидан мажбурий тартибда ундириб олиш ҳуқуқига эга. Клубнинг апелляция бериш учун 19 февралгача вақти бор.
Эслатиб ўтамиз, 2024 йилда Франция Профессионал футбол лигаси (LFP) «Реал»га ўтган форвардга 55 миллион евро миқдоридаги маош ва бонусларни тўлаб бериш мажбуриятини «ПСЖ» зиммасига юклаган эди. 2025 йил декабр ойида эса Париж меҳнат низолари суди клуб футболчига таътил пулларини ҳисобга олган ҳолда жами 60,9 миллион евро тўлаши кераклиги ҳақида қарор чиқарди. Клубнинг собиқ футболчисига нисбатан киритган барча молиявий эътирозлари суд томонидан тўлиқ рад этилган.
