Мбаппе 3–8 ҳафтага сафдан чиқиши мумкин — физиотерапевт
«Реал Мадрид» ва Франция терма жамоаси ҳужумчиси Килиан Мбаппе тиззасидан олган жароҳати сабаб бир неча ҳафта майдонга туша олмаслиги мумкин. Спорт жароҳатлари бўйича мутахассис, испаниялик физиотерапевт Анхел Вильянуэва футболчининг тикланиш муддати кўп ҳолатларда 3 ҳафтадан 8 ҳафтагача давом этишини тахмин қилди. Бу ҳақда мутахассис ўзининг X саҳифасида маълум қилган.
Вильянуэваның фикрича, тасвирларга қараганда оғриқ Мбаппенинг чап тиззаси орқа-ташқи қисмида жойлашган. Мутахассис асосий эҳтимол сифатида соннинг икки бошли мушагининг пастки қисмидаги чўзилиш ёки микрожароҳатни кўрсатган. Ташқи мениск шикастланиши ҳам эҳтимолий вариантлардан бири сифатида тилга олинган. Бироқ якуний ташхис тиббий текширувлардан сўнг аниқланади.
Физиотерапевтга кўра, енгил жароҳатда тикланиш 2–3 ҳафта, ўртача даражада 4–6 ҳафта, жиддий ҳолатда эса 6–8 ҳафта давом этиши мумкин. Энг оғир сценарийда, яъни жиддий узилиш аниқланса, футболчи 10–12 ҳафтагача сафдан чиқиши эҳтимоли бор. Франция футбол федерацияси ҳозирча Мбаппеда чап тиззанинг пай соҳаси шикастланганини расман маълум қилган.
Маълумот учун, Мбаппе Миллатлар лигаси доирасидаги Туркияга қарши учрашувда ғалаба голини урганидан сўнг тиззасидан жароҳат олди. Франция 0:1 ҳисобида ғалаба қозонган баҳсдан кейин ҳужумчи терма жамоа қароргоҳини тарк этиб, қўшимча текширувлардан ўтиш учун Мадридга қайтди.
