Мавсумнинг омадсиз мураббийлари
Ортда қолган мавсумда ёмон таассурот қолдирган мураббийларга эътибор қаратамиз. Бу ерда топ мураббийлар, ишдан кетганларни ҳам кўриш мумкин. Демак, рўйхат қуйидагича кўриниш олган.
Рубен Аморим
Португалиялик мутахассиснинг номзоди менда ўтган мавсумданоқ шубҳа уйғотган эди. Чунки «Юнайтед» чемпионатни 15-ўринда якунлаб, атиги 42 очко тўплаган, устакка-устак Европа Лигаси финалида «Тоттенхэм»га мағлуб бўлган эди. Албатта, кўпчилик мураббийни ҳимоя қилиши мумкин эди — унга тен Хаг давридан кейин муаммоли жамоа қолган, у мавсум олди тайёргарликни ўтказмаган, таркиб унга мос эмас эди, вақт бериш керак деган фикрлар ҳам бор эди.
Бироқ янги мавсум ҳам ишончли бошланмади. Жамоа Лига кубогида ҳатто 4-лига вакили «Гримсби Таун»га ютқазиб, мусобақани тарк этди. Клуб амалда еврокубоклар учун курашдан четда қолди ва шу сабаб йил бошида Аморим ишдан бўшатилди. Унинг ўрнига Майкл Каррик келиб, шу таркиб билан ҳам юқори ўринлар учун курашиш мумкинлигини исботлади. Натижада «Манчестер Юнайтед» мавсумни кучли учликда якунлади.
Арне Слот
Ўтган мавсумда нидерландиялик мураббий ҳаммани ҳайратда қолдириб, «Ливерпуль»ни биринчи йилиёқ чемпион қилди. У Юрген Клоппдан кейин жамоани қабул қилиб, дарҳол натижа берди. Шу боис янги мавсумда ҳам камида шундай натижалар кутилганди.
Мавсум бошланиши жуда яхши бўлди — «Ливерпуль» илк 5 ўйинда ғалаба қозонди. Аммо кейин жамоа ўйини пасайиб, натижалар ёмонлаша бошлади ва турнир жадвалида пастлаб кетди. Ҳатто Слотни ишдан бўшатиш ҳақида гаплар ҳам тарқалди.
Шунга қарамай, клуб раҳбарияти Слотни ишдан бўшатмади ва унга ишонч билдирди. Бу, албатта, унинг аввалги чемпионлиги билан боғлиқ. Иккинчи мавсумда эса кўп омиллар салбий таъсир қилди: Диогу Жотанинг вафоти, янги футболчиларнинг мослаша олмагани, Мохамед Салоҳ ва Виржил ван Дейк каби етакчиларнинг формаси пасайгании.
Шунга қарамай, у ишини давом эттиради, чунки жамоа яна Чемпионлар Лигасига йўл олди.
Нуну Эшпириту Санту
Ўтган мавсумда португалиялик мураббийнинг иши барчани ҳайратга солган эди — «Ноттингем Форест» узоқ йиллардан сўнг еврокубокларга йўлланма олганди. Аммо бу мавсум у мутлақо муваффақиятсиз ўтди.
Мавсум бошиданоқ жамоа қониқарсиз ўйин кўрсатди ва турнир жадвалида пастда қолди. Балки клуб эгаси Маринакис уни тезда ишдан бўшатиб юборди, унга имконият бериш керак эди. Бироқ «Вест Хэм»га қарши 0:3 ҳисобидаги мағлубиятдан сўнг у ишдан олинди.
«Ноттингем» кейин бир нечта мураббийни алмаштирди, Санту эса «Вест Хэм»ни бошқариш учун Лондонга йўл олди. У аввал «Тоттенхэм»да ҳам ишлаган, аммо у ерда ҳам муваффақият қозона олмаган эди.
«Вест Хэм»да ҳам у жамоани қутқара олмади. Клуб мавсум бошиданоқ тушиб кетиш зонасида қолди ва у ердан чиқа олмади. Натижада жамоа Премьер-лигадан тушиб кетди.
Томас Франк
Даниялик мураббий «Брентфорд»да яхши ишлаб, жамоани элитага олиб чиққан эди. Шу сабаб унга каттароқ клубда ишлаш имконияти берилди ва у «Тоттенхэм» бош мураббийига айланди.
Мавсум бошида натижалар ёмон эмас эди, ҳатто «Манчестер Сити» устидан ғалаба ҳам қайд этилди. Аммо кейин жамоа кескин пасайди. Жароҳатлар ҳам таъсир қилди, лекин асосий муаммо — мураббийнинг жамоа устидан назоратни йўқотгани бўлди.
Қизиғи, Чемпионлар Лигасида «Тоттенхэм» 1/8 финалга чиқди, аммо ички чемпионатда инқироз давом этди. Натижада Франк ишдан бўшатилди. Унинг ўрнига келган мураббийлар ҳам вазиятни яхшилай олмади ва жамоа ҳатто 18-ўринга тушиб кетди. Фақат Роберто Де Зерби келгач, жамоа сўнгги паллада жон сақлаб қолди.
Лиам Росеньер
Англиялик мураббий аввал пастки дивизионларда ишлаган, кейин Францияда «Страсбург»ни бошқариб, жамоани Конференциялар Лигасига олиб чиққан.
«Челси» эса Энцо Мареска бошчилигида яхши натижалар кўрсатган — жамоа Чемпионлар Лигасига қайтган ва бир нечта совринларни қўлга киритган эди. Шунга қарамай, клуб раҳбарияти уни ишдан бўшатиб, Росеньерни тайинлади.
Бу қарор бошиданоқ тушунарсиз эди. Росеньер катта ютуқларга эга эмасди. Натижада у жамоани яхшилай олмади — «Челси» ўйини пасайди, жамоа кетма-кет бир нечта ўйинда ғалаба қозона олмади ва мураббий ишдан бўшатилди. Аммо «Челси» яхшигина товон пулини тўлашда давом этмоқда.
