Mavsumning omadsiz murabbiylari
Ortda qolgan mavsumda yomon taassurot qoldirgan murabbiylarga e'tibor qaratamiz. Bu yerda top murabbiylar, ishdan ketganlarni ham ko'rish mumkin. Demak, ro'yxat quyidagicha ko'rinish olgan.
Ruben Amorim
Portugalialik mutaxassisning nomzodi mendan o'tgan mavsumdayoq shubha uyg'otgan edi. Chunki "Yunayted" chempionatni 15-o'rinda yakunlab, atigi 42 ochko to'plagan, ustiga-ustak Yevropa Ligasi finalida "Tottenhem"ga mag'lub bo'lgan edi. Albatta, ko'pchilik murabbiyni himoya qilishi mumkin edi — unga ten Hag davridan keyin muammoli jamoa qolgan, u mavsumoldi tayyorgarlikni o'tkazmagan, tarkib unga mos emas edi, vaqt berish kerak degan fikrlar ham bor edi.
Biroq yangi mavsum ham ishonchli boshlanmadi. Jamoa Liga kubogida hatto 4-liga vakili "Grimsby Town"ga yutqazib, musobaqani tark etdi. Klub amalda evrokuboklar uchun kurashdan chetda qoldi va shu sabab yil boshida Amorim ishdan bo'shatildi. Uning o'rniga Maykl Karrik kelib, shu tarkib bilan ham yuqori o'rinlar uchun kurashish mumkinligini isbotladi. Natijada "Manchester Yunayted" mavsumni kuchli uchlikda yakunladi.
Arne Slot
O'tgan mavsumda niderlandiyalik murabbiy hammani hayratda qoldirib, "Liverpul"ni birinchi yiliyoq chempion qildi. U Yurgen Kloppdan keyin jamoani qabul qilib, darhol natija berdi. Shu bois yangi mavsumda ham kamida shunday natijalar kutilgandi.
Mavsum boshlanishi juda yaxshi bo'ldi — "Liverpul" ilk 5 o'yinda g'alaba qozondi. Ammo keyin jamoa o'yini pasayib, natijalar yomonlasha boshladi va turnir jadvalida pastlab ketdi. Hatto Slotni ishdan bo'shatish haqida gaplar ham tarqaldi.
Shunga qaramay, klub rahbariyati Slotni ishdan bo'shatmadi va unga ishonch bildirdi. Bu, albatta, uning avvalgi chempionligi bilan bog'liq. Ikkinchi mavsumda esa ko'p omillar salbiy ta'sir qildi: Diogu Jotaning vafoti, yangi futbolchilarning moslasha olmagani, Mohamed Salah va Virjil van Deyk kabi yetakchilarning formasi pasaygani.
Shunga qaramay, u ishini davom ettiradi, chunki jamoa yana Chempionlar Ligasiga yo'l oldi.
Nunu Eshpiritu Santu
O'tgan mavsumda portugalik murabbiyning ishi barchani hayratga solgan edi — "Nottingem Forest" uzoq yillardan so'ng evrokuboklarga yo'llanma olgandi. Ammo bu mavsum u mutlaqo muvaffaqiyatsiz o'tdi.
Mavsum boshidan jamoa qoniqarsiz o'yin ko'rsatdi va turnir jadvalida pastda qoldi. Balki klub egasi Marinakis uni tezda ishdan bo'shatib yubordi, unga imkoniyat berish kerak edi. Biroq "Vest Xem"ga qarshi 0:3 hisobidagi mag'lubiyatdan so'ng u ishdan olindi.
"Nottingem" keyin bir nechta murabbiyni almashtirdi, Santu esa "Vest Xem"ni boshqarish uchun Londonga yo'l oldi. U avval "Tottenhem"da ham ishlagan, ammo u yerda ham muvaffaqiyat qozona olmagan edi.
"Vest Xem"da ham u jamoani qutqara olmadi. Klub mavsum boshidan tushib ketish zonasida qoldi va u yerdan chiqa olmadi. Natijada jamoa Premyer-ligadan tushib ketdi.
Tomas Frank
Daniyalik murabbiy "Brentford"da yaxshi ishlab, jamoani elitaga olib chiqqan edi. Shu sabab unga kattaroq klubda ishlash imkoniyati berildi va u "Tottenhem" bosh murabbiyiga aylandi.
Mavsum boshida natijalar yomon emas edi, hatto "Manchester Siti" ustidan g'alaba ham qayd etildi. Ammo keyin jamoa keskin pasaydi. Jarohatlar ham ta'sir qildi, lekin asosiy muammo — murabbiyning jamoa ustidan nazoratni yo'qotgani bo'ldi.
Qizig'i, Chempionlar Ligasida "Tottenhem" 1/8 finalga chiqdi, ammo ichki chempionatda inqiroz davom etdi. Natijada Frank ishdan bo'shatildi. Uning o'rniga kelgan murabbiylar ham vaziyatni yaxshilay olmadi va jamoa hatto 18-o'ringa tushib ketdi. Faqat Roberto De Zerbi kelgach, jamoa so'nggi pallada jon saqlab qoldi.
Liam Rosenior
Angliyalik murabbiy avval pastki divizionlarda ishlagan, keyin Fransiyada "Strasburg"ni boshqarib, jamoani Konferensiyalar Ligasiga olib chiqqan.
"Chelsi" esa Entso Mareska boshchiligida yaxshi natijalar ko'rsatgan — jamoa Chempionlar Ligasiga qaytgan va bir nechta sovrinlarni qo'lga kiritgan edi. Shunga qaramay, klub rahbariyati uni ishdan bo'shatib, Roseniorni tayinladi.
Bu qaror boshidan tushunarsiz edi. Rosenior katta yutuqlarga ega emasdi. Natijada u jamoani yaxshilay olmadi — "Chelsi" o'yini pasaydi, jamoa ketma-ket bir nechta o'yinda g'alaba qozona olmadi va murabbiy ishdan bo'shatildi. Ammo "Chelsi" yaxshi kompensatsiya to'lashda davom etmoqda.
