Мауро Икарди саудияликларнинг 120 миллион евролик таклифини рад этгани маълум бўлди
«Галатасарой» ҳужумчиси Мауро Икарди 2023 йилнинг ёзида Саудия Арабистонидан келган жуда катта молиявий таклифни рад этган. Fichajes нашрининг хабар беришича, футболчининг агенти Жорж Гардига кўра, аргентиналик форвардга уч йиллик, 120 миллион евродан ошиб кетувчи шартнома таклиф қилинган.
«У 2023 йил ёзида Саудия Арабистонидан келган 120 миллион евродан юқори бўлган таклифни рад этди, чунки у мухлисларнинг меҳрини ҳис қилди ва клубда қолишга қарор қилди», — дейди футболчининг агенти.
Икардининг «ПСЖ»дан «Галатасарой»га тўлиқ трансфери айнан 2023 йилда расмийлашган ва шундан сўнг унга Яқин Шарқ лигасидан йирик молиявий таклиф келиб тушган.
Жорий мавсумда 32 ёшли ҳужумчи баъзан захирадан майдонга тушаётган бўлса-да, Туркия чемпионатида ўтказган 11 учрашувда 6 та гол уришга муваффақ бўлди. Аргентиналик футболчининг клуб билан амалдаги шартномаси келаси йилнинг ёзида якунланади.
