Машҳур франциялик футболчи зўравонликда айбланмоқда
Димитри Пайе атрофида навбатдаги можаро авж олди. Аввалроқ «Вест Хэм» ва «Марсель» сафида тўп сурган франциялик вингер 2023–2025 йилларда Бразилиянинг «Васко да Гама» клуби шарафини ҳимоя қилган эди. Энди футболчи яна жиддий айбловлар марказида қолмоқда.
Футболчининг собиқ севгилиси уларнинг Бразилиядағы муносабатлари давомида жисмоний, руҳий ва жинсий босимга учраганини маълум қилди. Бу ҳақда Британиянинг The Sun нашри хабар бермоқда.
Айбловларни илгари сурган Ларисса Феррари — адвокат ва инфлюенсернинг сўзларига кўра, у Пайе билан 2023 йилда ижтимоий тармоқлар орқали танишган. Дастлаб футболчи ўзини ғамхўр тутган, бироқ вақт ўтиши билан унинг ҳаракатлари ўзгарган: у ҳар бир қадамни назорат қила бошлаган ва камситувчи муносабат кўрсатган. Феррари 2024 йил апрел ойида Бразилия полициясига мурожаат қилиб, футболчи унга нисбатан зўравонлик қилганини билдирган.
Шунингдек, аёл Пайе уни хорловчи ҳаракатларга мажбурлагани ва ёнида ушлаб қолиш учун «психологик манипуляциялар»дан фойдаланганини таъкидлаган. Унинг айтишича, футболчи ўз алоқаларини атайлаб кўз-кўз қилган, кўплаб муносабатлари билан мақтанган, ҳақорат ва жазоларга йўл қўйган. Бундан ташқари, Феррари Пайедан ҳомиладор бўлганини, бироқ кейинчалик боласини йўқотганини ҳам даъво қилмоқда.
Димитри Пайе эса ўзига қўйилган барча айбловларни қатъиян рад этмоқда. Айни пайтда футболчи 2025 йил ёзида «Васко да Гама» билан шартномаси якунлангач, клубсиз қолган.
