«Масхарабозлар!»: Мбаппе «Валенсия»га қарши ўйиндаги ҳакамликни танқид қилди
Мадриднинг «Реал» клуби ҳужумчиси Килиан Мбаппе Испания Ла Лигасининг 23-тури доирасида «Валенсия»га (2:0) қарши кечган баҳсдаги ҳакамлик ишидан норози бўлди.
Мбаппенинг ғазаби танаффус арафасида юз берган эпизод сабаб бўлди. «Валенсия» ҳимоячилари тўпни узоқлаштирганидан сўнг, ҳакам франциялик форвардда офсайд ҳолатини қайд этди. Мбаппе нега ўйиндан ташқари ҳолат деб топилганини тушунмади ва захира ҳакамидан тушунтириш беришини сўради.
«Бу қандай қилиб офсайд бўлиши мумкин? Менга тушунтиришингиз керак. Келинг, трибуна остидаги хонага кирамиз ва менга ҳаммасини тушунтириб берасиз, чунки мен тушунмаяпман. Мен сиз билан гаплашяпман, сиз эса ҳатто менга қарамаяпсиз ҳам», — дея Мбаппенинг сўзларини келтирмоқда AS нашри.
Тўртинчи ҳакам унинг сўзларига эътибор бермаётганини кўрган Мбаппе жамоадоши Камавингага қараб, француз тилида: «Масхарабоз ҳакамлар», — дея хитоб қилди.
Испания чемпионатининг 23 та туридан сўнг «Реал Мадрид» 57 очко билан иккинчи ўринда бормоқда. «Валенсия» эса 23 очко билан 17-поғонани эгаллаган.
