Мартинес Аргентина футболчилари нима учун Испания кубокни олганида орқага ўгирилиб турганини изоҳлади
Аргентина терма жамоаси ҳимоячиси Лисандро Мартинес ЖЧ–2026 финалидан кейин юзага келган баҳсли вазиятга муносабат билдирди. У футболчилар Испания кубокни қабул қилаётган пайтда атайлаб ҳурматсизлик қилмаганини таъкидлади.
Мартинеснинг сўзларига кўра, ўша пайтда жамоа трибунадаги аргентиналик мухлислар билан бирга қўшиқ куйлаётган бўлган. Шу сабабли улар подиумга эмас, айнан мухлислар томон юзланган.
“Видеода биз камерага орқа ўгириб тургандек кўринади. Аслида эса мухлисларимиз билан бирга қўшиқ айтаётгандик. Бу уларга бўлган ҳурматимиз эди. Финалдан кейин эса Испания футболчилари ва мураббийлар штаби билан саломлашдик”, — деди Мартинес.
Шунингдек, ҳимоячи Аргентина терма жамоасига нисбатан айтилётган “кибрли жамоа” ҳақидаги танқидларни ҳам рад этди.
“Бизга кибрли деб айтишмоқда, аммо бу гапларни айтаётганлар ўзлари ҳақида кўпроқ маълумот бермоқда. Биз ҳар доим рақибларимизга ҳурмат билан муносабатда бўлганмиз”, — дея қўшимча қилди у.
Эслатиб ўтамиз, ЖЧ–2026 финалида Испания Аргентина устидан 1:0 ҳисобида ғалаба қозонган эди. Учрашувдан кейин аргентиналик футболчиларнинг Испания кубокни қабул қилаётган пайтда орқа ўгириб тургани ижтимоий тармоқларда кенг муҳокамаларга сабаб бўлганди.
