Марсело Месси ва Роналду ўртасида танлов қилди
«Реал Мадрид»нинг собиқ ҳимоячиси Марсело Виера Лионель Месси ва Криштиану Роналду ўртасидаги танловда португалиялик собиқ жамоадошини афзал кўрди. Бразилиялик футбол афсонаси саволга узоқ ўйланмасдан Роналду фойдасига жавоб берди. Бу ҳақда «Si Somos Gemelos» саҳифаси хабар бермоқда.
Манбага кўра, Марселодан Месси ёки Роналду — қайси бирини танлаши сўралган. Собиқ ҳимоячи бунга: «Криштиану — ўлгунимча!» дея жавоб берган. Марсело ва Роналду «Реал Мадрид» сафида тўққиз мавсум давомида бирга тўп тепган.
Марсело аввал ҳам икки футболчига юқори баҳо берган. У Мессини майдонда қарши ўйнаш энг қийин бўлган футболчилардан бири деб атаган бўлса-да, шахсий танловда Роналдуга устунлик беришини, бунга улар узоқ йиллар бир жамоада ўйнагани ҳам таъсир қилишини таъкидлаган.
Маълумот учун, Марсело «Реал Мадрид» сафида 546 та учрашув ўтказиб, 38 та гол урган ва клуб билан 25 та соврин, жумладан 5 та Чемпионлар лигаси кубогини қўлга киритган. Криштиану Роналду эса мадридликлар сафида 438 ўйинда 451 та гол урган. Марсело ва Роналду «Реал» таркибида жами 332 та учрашувда бирга майдонга тушган.
