Марко Верратти молиявий қоидаларни бузгани учун Италияда жаримага тортилди
Қатарнинг «Ал-Дуҳайл» клуби яримҳимоячиси, Италиянинг «Пескара» клуби ҳаммуассиси ҳисобланган Марко Верратти Италия футбол федерациясининг молиявий қоидаларини бузган шахслардан бири бўлиб чиқди. Бу ҳақда Calcio e Finanza нашри хабар бермоқда.
Манбанинг хабар беришича, Италия Федерал суди «Пескара» президенти Даниеле Себастиани, шунингдек, клубга эгалик қилиш ва уни бошқаришга алоқадор бўлган бир нечта шахсларга, жумладан, Италия терма жамоасининг собиқ футболчиси Марко Верратти ва унинг рафиқаси Жессика Айдига нисбатан санкциялар қўллади. Жазо чораси сифатида 9 мингдан 20 минг евросигача бўлган миқдорда жарималар белгиланди.
Ушбу қарор FIGC томонидан белгиланган шаффофликни таъминлаш бўйича мажбуриятларга риоя қилинмаганлиги билан боғлиқ. Марко Верратти клубдаги улушни сотиб олганидан сўнг, янги акциядорларнинг молиявий барқарорлиги ва ишончлилигини тасдиқловчи ҳужжатлар, федерал ҳокимият органларининг эслатмасига қарамасдан, белгиланган муддатларда тегишли комиссияга тақдим этилмаган.
Якунланган мавсум натижаларига кўра, «Пескара» жамоаси Серия B турнир жадвалида охирги, 20-ўринни эгаллади.