Маркиньос: «Энди эришилган ютуқлар билан тўхтаб қолиш мумкин эмас»
«ПСЖ» сардори Маркиньос жамоасининг Чемпионлар лигаси финалидаги ғалабасига муносабат билдирди.
«Бу ақл бовар қилмайди. Бизга айтишганди: биринчи марта — бу тарих, иккинчи марта — бу афсонага айланиш. Таътилдан қайтган кунимизданоқ бизга руҳлантирган нарса шу бўлди. Иккинчи чемпионликни қўлга киритиш янада қийинроқ. Мавсум узоқ давом этди. Биз кўп ишладик, кўп нарсаларни бошдан кечирдик. Мавсум бошида бизда анча қийинчиликлар бўлди, лекин жамоа керакли пайтда ўз суръатини топди — айнан шу нарса бизга бундай натижага эришиш имконини берди. Бу жамоа билан биз буюк ишларга қодирмиз.
Пеналтилар сериясидаги ечимга келсак [ўтган йилги 5:0 ҳисобидан фарқли ўлароқ], ҳиссиётлар бутунлай бошқача. Биринчи ғалаба қандай қўлга киритилганидан қатъи назар, ажойиб эди. Лекин бу сафаргиси ҳам шундай, чунки у анча қийинроқ бўлди. Бизни учинчи чемпионликни қўлга киритишга ундайдиган мураббийимиз бор. Аммо келгуси мавсум ҳам деярли дам олишсиз ўтади.
Мураббий бу мавсумда ҳар бир футболчи учун ўйин вақтини аъло даражада тақсимлади. Бугун бизда тўлиқ таркиб бор эди. Лекин энди эришилган ютуқлар билан тўхтаб қолиш мумкин эмас. Биз иккита чемпионликни қўлга киритдик — ғалабаларга бўлган очликни сақлаб қолишимиз керак, акс ҳолда клуб пастга шўнғиши мумкин, биз эса буни хоҳламаймиз. «ПСЖ» ажойиб онларни бошдан кечиришга лойиқ. Биз бундай йирик ғалабаларга қандай эришишни тушундик — ўзимизга нисбатан юқори талабларни сақлаган ҳолда шу руҳда давом этишимиз керак.
Луис Энрике ҳаммага қулай бўлган аҳил жамоа ярата олди. У бизга сингдираётган менталитет туфайли биз ажойиб вақт ўтказяпмиз», — дея Маркиньоснинг сўзларини келтиради L’Équipe.
Эслатиб ўтамиз, «ПСЖ» кетма-кет иккинчи марта Чемпионлар Лигаси ғолибига айланди.
