Маркиньос: «Анчелотти бизга Жаҳон чемпионати олдидан керакли бўлган ҳақиқий учқунни олиб кирди»
Бразилия терма жамоаси ҳимоячиси Маркиньос бош мураббий Карло Анчелоттининг жамоадаги роли ҳақида гапирди. Италиялик мутахассис 2025 йил 12-май куни миллий терма жамоа бошқарувига келган эди.
«Анчелотти — жамоани қандай қилиб чемпионга айлантиришни биладиган кўп карра ғолиб (Европанинг топ-5 лигаларида). Ўйлайманки, у ҳозир рульда тургани биз учун жуда муҳим. У муқаррар бўлган қийинчиликлар ва босимни ажойиб тарзда енгиб ўтмоқда.
Ёнингда ўз жамоасини, ўйинчиларини чин дилдан тушунадиган, ўйиннинг тактик томонини жуда яхши биладиган ва энг муҳими — чемпион бўлиш учун нима кераклигини ҳаммадан яхши англайдиган мураббий борлигидан хурсандмиз. У жамоага ҳақиқий учқунни — Жаҳон чемпионати олдидан бизга жуда зарур бўлган қўшимча устунликни олиб кирди», — дея Маркиньоснинг сўзларини келтирмоқда FIFA расмий сайти.
Маълумот учун, Анчелотти 2013 йилдан 2015 йилгача ҳамда 2021 йилдан 2025 йилгача Мадриднинг «Реал» клуби бош мураббийи лавозимида ишлаган.
Ушбу даврда унинг қўл остида Испания клуби уч марта Чемпионлар лигасида ғолиб чиққан, икки марта Испания чемпиони бўлган, икки марта Испания кубоги ва Суперкубогини қўлга киритган, уч марта УЕФА Суперкубогида ғалаба қозонган, Қитъалараро кубок ҳамда икки марта клублар ўртасидаги жаҳон чемпионлигига эга чиққан.