Марказий банки миллий терма жамоанинг Жаҳон чемпионатидаги иштирокига бағишланган эсдалик тангаларини муомалага чиқаради
Ўзбекистон Республикаси Марказий банки миллий терма жамоамизнинг футбол бўйича 2026-йилги Жаҳон чемпионатидаги тарихий иштирокини кенг жамоатчиликка етказиш ҳамда мамлакат спорт тарихидаги ушбу муҳим воқеани муҳрлаш мақсадида махсус коллекцион олтин ва кумуш эсдалик тангаларини муомалага чиқармоқда.
Асиллик даражаси 999,9 бўлган соф олтин ва кумушдан зарб этилган мазкур тангаларнинг бош қисмда Ўзбекистон футбол ассоциацияси (ЎФА) расмий логотипи, классик футбол тўпи тасвири ҳамда «Тарихий зафар. Ўзбекистон футболи Жаҳон чемпионатида - 2026» номли махсус матн ўрин олган.
Танга дизайн концепциясида миллий терма жамоанинг рамзий номи ҳисобланган «Оқ бўрилар» тимсолига алоҳида урғу берилган. Унда акс этган бўри силуэти мусобақа қайдномасидан ўрин олган 26 нафар футболчи рамзи бўлиб, ушбу тарихий натижа бутун жамоанинг аҳиллиги, бирдамлиги ва юксак меҳнати маҳсули эканини ифодалайди.
Марказий банк томонидан чекланган тиражда чиқарилаётган мазкур эсдалик тангалари 2026-йилнинг 18-июн кунидан бошлаб юртимиздаги тижорат банкларининг ҳудудий филиалларида расман сотувга қўйилади.