Марк Кукуреля келажакда «Барселона»га қайтишни инкор этмади
«Челси» клуби ва Испания терма жамоаси ҳимоячиси Марк Кукуреля ўз фаолиятининг қайсидир босқичида «Барселона»га қайтиш истаги борлигини билдирди.
«Барселона»га қайтиш? Испания — бу доим Испания бўлиб қолади. Инсон доим ортга қайтиш ҳақида ўйлайди, лекин мен буни бир неча йилга кечиктирган бўлардим. Ҳозир Англияда ўзимни яхши ҳис қиляпман. Агар шундай имконият пайдо бўлса, рад этиш қийин бўлади. Ҳаммасини яхшилаб ўйлаб кўришим керак. Агар бу содир бўлса — демак, шундай бўлиши керак экан», — дея Кукурелянинг сўзларини X ижтимоий тармоғидаги The Touchline саҳифаси келтирмоқда.
Кукуреля «Барселона» тарбияланувчиси ҳисобланади, бироқ клубнинг асосий жамоасида бор-йўғи битта ўйин ўтказган. Ҳимоячининг асосий таркибдаги дебюти 2017 йил октябрь ойида Испания кубоги доирасидаги «Мурсия»га қарши баҳсда юз берган эди. 2018 йил августда у Ла Лиганинг «Эйбар» клубига ижарага берилди ва 25 сентябрь куни «Эспаньол»га қарши баҳсда Испания олий дивизионидаги илк ўйинини ўтказди.
Марк Кукуреля 2022 йил август ойида «Брайтон»дан «Челси»га ўтган эди. Ҳимоячининг Лондон клуби билан амалдаги шартномаси 2028 йилнинг июнига қадар мўлжалланган.
