Марадонанинг ўғли: \"Фақат ахмоқларгина отам ва Мессини бир-бири билан солиштиради\"
Афсонавий аргентиналик футболчи Диего Марадонанинг ўғли Диего Жуниор Лионель Месси ва унинг отаси ўртасидаги солиштиришларга қатъий муносабат билдирди. Унинг фикрича, мутлақо бошқа-бошқа даврлар сабабли бундай мунозараларни ўтказиш мутлақо маъносиздир.
"Месси ва отамни ўзаро солиштиришни фақатгина тентаклар қилиши мумкин, мен буни барча ҳурматни сақлаган ҳолда айтаяпман. Биринчидан, Мессининг ўзи ҳам буни имкони йўқ эканини, чунки Диего — биринчи рақамли эканини айтган. Иккинчидан, футбол ўзгарди. Майдондаги ҳар қандай тепишлар, зарбалар ва калтакланишлар оддий ҳол ҳисобланган даврда тўп сурган футболчини, ҳар қандай кичик контакт учун пеналти бериладиган бугунги давр ўйинчиси билан қандай солиштириш мумкин? Учинчидан эса, ўзга сайёраликларни оддий инсонлар билан тенглаштириб бўлмайди", — дея Диего кичикнинг сўзларидан иқтибос келтирмоқда Mundo Deportivo нашри.
Унинг қўшимча қилишича, Месси ҳатто ўнта Жаҳон чемпионатида ғалаба қозонган тақдирда ҳам, бу солиштирувда ҳеч нарса ўзгармайди: "Бизга фақатгина ушбу икки феноменал иқтидор эгаларини олқишлаш қолади, холос".
Эслатиб ўтамиз, Аргентина терма жамоаси бугун, 19-июл куни ЖЧ-2026 финалида Испанияга қарши майдонга тушади.
