Марадона «Худонинг қўли» голини урган тўп аукционда 3,35 миллион долларга сотилди
Диего Марадона 1986-йилга Жаҳон чемпионатида Англияга қарши «Худонинг қўли» номи билан машҳур бўлган голни урган тўп аукционда 3,35 миллион долларга сотилди. Савдолар АҚШдаги Heritage Auctions аукцион уйида ўтказилди.
Гап Аргентина ва Англия ўртасидаги ЖЧ-1986 чорак финал учрашувида фойдаланилган Adidas Azteca тўпи ҳақида кетмоқда. Айни шу тўп билан Марадона аввал қўли ёрдамида баҳсли гол урган, орадан тўрт дақиқа ўтиб эса якка юришдан сўнг яна бир гол киритган.
Аукциондаги лотнинг бошланғич нархи 2,5 миллион долларни ташкил этди. Ташкилотчилар тарихий тўп учун 10 миллион долларгача маблағ тушишини кутган, бироқ якуний нарх бу кўрсаткичдан анча паст бўлди.
Маълумот учун, 1986-йилга чорак финал Аргентина терма жамоасининг 2:1 ҳисобидаги ғалабаси билан якунланган. Марадона ушбу учрашувда иккала голни ҳам урган ва кейинчалик Аргентина турнир ғолибига айланган.
