Мануэль Нойер Жаҳон чемпионатлари тарихида мутлақ рекорд ўрнатди
Германия миллий терма жамоаси посбони Мануэль Нойер ЖЧ-2026 гуруҳ босқичининг 2-туридан ўрин олган Кот-д'Ивуар терма жамоасига қарши учрашувда дарвозабонлар учун мундиаллардаги ўйинлар сони бўйича тарихий рекордни қайд этди. Канаданинг Торонто шаҳридаги «Би-Эм-О Филд» ўйингоҳида бўлиб ўтаётган ушбу баҳсни парагвайлик бош ҳакам Хуан Габриэль Бенитес бошқариб бормоқда.
Нойер германияликларнинг мазкур ўйин учун танланган асосий таркибидан жой олди. Бу учрашув тажрибали дарвозабон учун Жаҳон чемпионатидаги 21-ўйинга айланди ва у ушбу кўрсаткич бўйича Франция терма жамоасининг собиқ посбони Уго Льорисни (20 та ўйин) ортида қолдириб, яккаму-якка пешқадамга айланди.
Эслатиб ўтамиз, 2026 йилги Жаҳон чемпионати Шимолий Америка қитъасининг уч мамлакати — АҚШ, Канада ва Мексика майдонларида 11 июндан 19 июлга қадар давом этади. Амалдаги жаҳон чемпиони Аргентина терма жамоаси ҳисобланади. Улар 2022 йили Қатарда ўтган мундиал финалида Франция билан дуранг ўйнаб (3:3), пенальтилар сериясида (4:2) ғалаба қозонган эдилар.