Мануэл Нойер Жаҳон чемпионатида майдонга тушган Германия терма жамоаси тарихидаги энг ёши катта футболчига айланди
Германия терма жамоаси дарвозабони Мануэл Нойер 2026-йилги Жаҳон чемпионати гуруҳ босқичининг 1-туридан ўрин олган Кюрасаога қарши учрашувда майдонга тушди. Шу тариқа, у немислар тарихида Европа ва Жаҳон чемпионатларида иштирок этган энг ёши катта футболчи сифатида қайд этилди. Бу ҳақда Opta Sport хабар бермоқда.
Кюрасаога қарши баҳс куни Нойер 40 ёш-у 79 кунлик эди. Бунгача йирик турнирларда «бундестим» сафида майдонга тушган энг ёши катта футболчи Лотар Маттеус ҳисобланарди. У Евро-2000 мусобақасининг Португалияга қарши ўйинида 39 ёш-у 91 кунликлигида қатнашган эди.
Гуруҳ босқичининг 2-турида Германия терма жамоаси Кот-д'Ивуар билан (20-июн), 3-турда эса Эквадор билан (25-июн) куч синашади. Кюрасао эса 2-турда Эквадор (21-июн), учинчи турда эса Кот-д'Ивуар (25-июн) билан тўқнаш келади.
Маълумот учун, гуруҳ босқичи учрашувлари 11-июндан 27-июнгача давом этади. Жамоалар ўзаро бир даврали тизимда (ҳар бири учтадан ўйин) баҳс олиб боришади. Плей-офф босқичига ҳар бир гуруҳдан иккитадан энг яхши жамоа ҳамда учинчи ўринни эгаллаган энг яхши 8 та терма жамоа йўл олади.
