Мануэль Нойер фаолиятини якунлаш эҳтимоли ҳақида фикр билдирди
“Бавария” дарвозабони Мануэль Нойер футболчилик фаолиятини 2027-йил ёзида якунлаши мумкинлиги ҳақидаги саволга жавоб берди. 40 ёшли германлик посбон ҳозирча якуний қарор қабул қилмаганини ва келажаги борасида шошилмаслигини таъкидлади.
Нойернинг айтишича, у аввало янги мавсумни юқори савияда ўтказиб, жамоа билан энг катта мақсадлар учун курашишни истайди. Дарвозабон мавсум якунлангач, вазиятга қараб кейинги фаолияти борасида қарор қабул қилишини билдирган.
“Бавария” яқинда “РБ Лейпциг”га қарши ўртоқлик учрашувида 3:1 ҳисобида ғалаба қозонди. Нойер ушбу баҳсдан кейин жамоанинг ҳолатини ижобий баҳолаб, футболчилар мавсумолди тайёргарлигида яхши формада эканини қайд этди.
Маълумот учун, Мануэль Нойернинг “Бавария” билан амалдаги шартномаси 2027-йил 30-июнгача мўлжалланган. Ўтган мавсумда у барча мусобақаларда 37 та учрашувда майдонга тушиб, 10 та баҳсда ўз дарвозаси дахлсизлигини сақлаб қолган.
