«Манчестер Юнайтед» Рафаэл Леау трансфери учун ўз юлдузларини алмашишга тайёр
Англиянинг «Манчестер Юнайтед» клуби «Милан» қанот ҳужумчиси Рафаэл Леауга жиддий қизиқиш билдирмоқда. «Қизил иблислар» португалиялик вингер трансфери бўйича келишувга ҳужумчилар Жошуа Зиркзе, Маркус Рэшфорд ҳамда яримҳимоячи Мануэл Угарте ҳамроҳлигини қўшишга тайёр. Бу ҳақда TEAMtalk хабар бермоқда.
Манбанинг маълум қилишича, трансфер жараёнида учала футболчининг бирданига иштирок этиши эҳтимоли паст, бироқ «Милан»га ушбу ўйинчилар орасидан танлаш имконияти берилиши мумкин. Келишувнинг эҳтимолий тафсилотлари қуйидагича:
- Жошуа Зиркзе варианти: Агар битимга Зиркзе қўшилса, манкуниянликлар қўшимча равишда тахминан 20 млн евро тўлашади.
- Маркус Рэшфорд варианти: Рэшфорднинг бозор қиймати 40 млн евродан баҳоланмоқда, бу эса «Юнайтед»нинг қўшимча тўлов харажатларини камайтиради. Бироқ футболчининг йиллик 10 млн евро миқдоридаги маоши «Милан» учун молиявий қийинчилик туғдириши мумкин.
Рафаэл Леау жорий мавсумда барча турнирларда 28 та ўйинда майдонга тушиб, 10 та гол ва 3 та голли узатма муаллифига айланди. 25 ёшли футболчининг «россонери»лар билан амалдаги шартномаси 2028 йилнинг ёзига қадар мўлжалланган. Transfermarkt портали португалиялик юлдузнинг трансфер баҳосини 65 млн евро этиб белгилаган.
