«Манчестер Юнайтед» Рафаэл Леау трансфери бўйича «Милан» билан боғланди
«Манчестер Юнайтед» «Милан» вингери Рафаэл Леаунинг трансфери имкониятларини ўрганишни бошлади. Инсайдер Николо Скиранинг хабар беришича, инглиз клуби италияликларга мурожаат қилиб, португалиялик футболчининг трансфер шартлари ҳақида маълумот сўраган.
Манбага кўра, Леау эндиликда «Милан»нинг узоқ муддатли режалари марказида эмас ва ёзги трансфер ойнасида клубини ўзгартиришга тайёр. Шу сабаб «Манчестер Юнайтед» вазиятни диққат билан кузатмоқда ва эҳтимолий трансфер бўйича дастлабки алоқаларни бошлаб юборган.
Ҳозирча клублар ўртасида расмий таклиф юборилгани йўқ. «Манчестер Юнайтед» авваламбор трансфернинг молиявий шартлари ва футболчининг талаблари билан танишишни мақсад қилган.
26 ёшли Рафаэл Леау 2019 йилдан буён «Милан» сафида тўп сурмоқда. У Италия клубида 290 та учрашувда майдонга тушиб, 80 та гол урган ҳамда жамоанинг асосий етакчиларидан бири сифатида эътироф этилган.
