“Манчестер Юнайтед” Мартинес билан хайрлашиши мумкин
“Манчестер Юнайтед” ҳимоячиси Лисандро Мартинеснинг клубдаги келажаги сўроқ остида қолди. Аргентиналик футболчининг жамоа раҳбариятини очиқ танқид қилганидан сўнг унинг шартномаси узайтирилишига шубҳа пайдо бўлган. Бу ҳақда Sky Sports News хабар бермоқда.
Манбага кўра, Мартинеснинг амалдаги шартномаси 2027-йил ёзида якунланади. Клубда келишувни яна бир йилга узайтириш имконияти мавжуд бўлса-да, раҳбарият ҳозирча бу борада якуний қарорга келмаган. Футболчининг кескин баёнотлари эса унинг жамоадаги мавқеига салбий таъсир кўрсатиши мумкин.
Мартинес яқинда клуб спорт директори Жейсон Уилкоксни трансфер сиёсати учун танқид қилган эди. Ҳимоячининг фикрича, жамоа юқори ўринлар учун курашиши учун таркибни етарлича кучайтирмаган. Энди “Манчестер Юнайтед” келгуси трансфер ойнасида янги марказий ва чап қанот ҳимоячиларини излашни режалаштирмоқда.
Маълумот учун, Лисандро Мартинес 2022-йилда Амстердамнинг “Аякс” клубидан “Манчестер Юнайтед”га трансфер қилинган. Аргентиналик футболчи 2022-йилда жаҳон чемпионига айланган. Клуб раҳбарияти унинг сўнгги баёнотлари учун интизомий чора қўллаш масаласини ҳам кўриб чиқмоқда.
