«Манчестер Юнайтед» Мануэль Угартени сотиб юбормоқчи
«Манчестер Юнайтед» клуби таянч яримҳимоячиси Мануэль Угартени сотишга тайёр. Бу ҳақда TEAMtalk нашри хабар бермоқда.
Манбанинг ёзишича, инглиз клуби Уругвай терма жамоаси аъзосини «ПСЖ»дан сотиб олиш учун 50 миллион фунт стерлинг сарфлаган эди, бироқ бу трансфер кутилган натижани бермади.
Угарте жамоадаги иккинчи мавсумида асосан ротация ўйинчисига айланиб қолди. У Англия Премьер-лигасининг жорий мавсумида атиги 7 та ўйинни асосий таркибда бошлади. «Юнайтед» раҳбарияти келаётган ёзда яримҳимоячи билан хайрлашишга қарши эмас. Ҳатто жамоанинг яна бир таянч яримҳимоячиси Каземиро клубни тарк этаётган бўлса-да, Угартенинг кетиши кун тартибидан тушмаган. Айни пайтда футболчига Туркия ва Италия клублари қизиқиш билдирмоқда.
Маълумот учун, Мануэль Угарте 2024 йилнинг ёзидан буён манккуниянликлар шарафини ҳимоя қилиб келмоқда. У жорий мавсумда барча турнирлар доирасида 23 та учрашувда майдонга тушди, бироқ самарали ҳаракатларни амалга ошира олмади. Футболчининг клуб билан амалдаги шартномаси 2029 йилнинг ёзига қадар мўлжалланган.
