«Манчестер Сити» профессионал футболдан бутунлай четлатилиши мумкин — Бен Жейкобс
«Манчестер Сити» профессионал футболдан бутунлай четлатилиши мумкин — Бен Жейкобс
«Шаҳарликлар» 2009 йилдан 2018 йилгача АПЛнинг молиявий қоидаларини бузганликда айбланмоқда.
Англиянинг «Манчестер Сити» клуби АПЛ молиявий қоидаларини бузганлиги тўғрисидаги иш доирасида жуда жиддий оқибатларга дуч келиши мумкин. Бу ҳақда журналист Бен Жейкобс ўзининг YouTube каналида маълум қилди.
«Агар «Манчестер Сити» Премьер-лигадан четлаштирилса, ЕФЛ ҳукм билан танишиб чиқишни ва бирдамлик белгиси сифатида АПЛ позициясини қўллаб-қувватлашни режалаштирмоқда, шунингдек, «Манчестер Сити»ни ўз мусобақаларига киритмасликка ҳаракат қилмоқда. Энг ёмон сценарийда «Манчестер Сити» умуман профессионал футболдан четлатилиши хавфи мавжуд. Аммо бу қонуний имкониятлардан бири, шунинг учун жазо қандай бўлиши ҳақида тахмин қилиш керак эмас», — деди Жейкобс.
Эслатиб ўтамиз, ЕФЛ Англиянинг Премьер-лигадан пастда жойлашган профессионал дивизионлари — Чемпионшип, Лига 1 ва Лига 2ни бирлаштиради.
Маълумот учун, «Манчестер Сити» 2009 йилдан 2018 йилгача АПЛнинг молиявий қоидаларини бузганликда айбланмоқда. Лига клубга қарши 115 та айбловни илгари сурди, хусусан, молиявий маълумотларни тақдим этиш, ўйинчилар ва мураббийларга тўловлар, шунингдек, УЕФАнинг молиявий фейр-плей қоидалари ва даромадлилик, барқарор ривожланиш талабларига риоя қилиш билан боғлиқ. Ишни мустақил комиссия кўриб чиқмоқда.
