“Манчестер Сити” Мармуш трансферида қанча олиши маълум бўлди

“Манчестер Сити” ҳужумчиси Омар Мармушнинг “Тоттенхэм”га трансфери орқали инглиз клуби тахминан 60 миллион евро олиши мумкин.

Мармуш 2025 йил январда “Айнтрахт”дан “Манчестер Сити”га ўтган эди. Унинг трансфери учун немис клубига 75 миллион евро кафолатланган сумма ва яна 5 миллион евро бонуслар кўринишида тўланиши белгиланган.

Энди 27 ёшли мисрлик футболчи “Тоттенхэм”га ўтиши кутилмоқда. Лондон клуби Мармуш билан бирга “Манчестер Сити”нинг бразилиялик вингери Савиньони ҳам таркибига қўшмоқчи. Икки футболчининг умумий трансфер қиймати 151 миллион евро атрофида бўлиши айтилмоқда.

Маълумот учун, Мармуш 2025 йилда “Манчестер Сити”га келганидан буён жамоа сафида 36 та учрашувда 8 та гол уриб, 3 та голли узатмани амалга оширган.