“Манчестер Сити” ҳимоячиси иккита ўйинга дисквалификация қилинди
“Манчестер Сити” ҳимоячиси Рико Льюис Клублар ўртасидаги Жаҳон чемпионатининг яна иккита ўйинини ўтказиб юборади. Бу ҳақда ESPN нашри хабар бермоқда.
Эслатиб ўтамиз, футболчи турнирнинг 1-туридан ўрин олган “Видад”га қарши учрашувнинг 88-дақиқасида қўполлиги учун қизил картончка билан жазоланганди. Шу сабаб Льюис “Ал-Айн”га қарши ўйинни ўтказиб юборди.
Манбага кўра, FIFA тартиб-интизом қўмитаси 20 ёшли футболчини яна иккита ўйинга дисквалификация қилишга қарор қилган. Шу тариқа, у гуруҳ босқичининг сўнгги тури ва мусобақанинг 1/8 финалини ўтказиб юборади.
Маълумот учун, “Манчестер Сити” турнирнинг 3-туридан “Ювентус”га қарши баҳс олиб боради. Учрашув 27-июн куни Тошкент вақти билан соат 00:00 да старт олади. Ушбу баҳс “G” гуруҳи ғолибини аниқлаб беради.
