«Манчестер Сити» футболчилари Будёга борган мухлисларга чипта пулларини қайтариб беришади
«Манчестер Сити» футболчилари Чемпионлар лигаси умумий босқичининг 7-турида «Будё-Глимт»га қарши ўйинда жамоани қўллаб-қувватлаш учун Норвегияга борган мухлисларга чипта пулларини қайтариб беради. Учрашув Будё шаҳридаги «Аспмюра» стадионида бўлиб ўтди ва унда инглиз клуби 1:3 ҳисобида мағлубиятга учради.
«Биз учун мухлислар — ҳамма нарсадан устун. Улар бизни уйда ҳам, сафарда ҳам қўллаб-қувватлаш учун дунё бўйлаб саёҳат қилишда қандай қурбонликларга борадиганини яхши биламиз ва буни ҳеч қачон оддий ҳолат сифатида қабул қилмаймиз. Улар дунёдаги энг зўр мухлислар. Совуқ об-ҳавода ва биз учун оғир кечада жамоани қўллаб-қувватлаган мухлислар узоқ йўл босиб келганини тушунамиз. Будёга келган мухлисларга чипта пулларини қайтариш — биз қила оладиган энг кам иш», — дейилади «шаҳарликлар» футболчилари баёнотида.
Манбага кўра, футболчилар мухлисларга жами 9 357 фунт стерлинг (10 760 евро) миқдоридаги маблағни қайтариб беришади.
